लहानपण देगा देवा

आताशा मज वाटे
व्हावे लहानगे
वेचावी फुले
खावी चिंचा बोरे
अगदी चवीचवीने
खेळावी भातुकली
मनसोक्त पणे
इवल्याशा मांडण्या
मांडून
बनवावा काहितरी खाऊ
अन् करावा फस्त
आपुल्याच सवंगड्यांसह
काय मजा आहे बुवा
आपुल्याच धुंदीत जगण्याची
ना कसला त्रास
ना कसले टेन्शन
छान मौज मजेत कसे
आपुल्याच कोशात गुरफटायचे
खरचं प्रत्येकानेच एक
लहान मूल आपुल्या
हृदयाच्या कुपीत दडवावे
अन् कधीतरी त्याला
उत्छृंखलपणे खेळू द्यावे
अन् घ्यावी अनुभूति
परत लहान  झाल्याची


मृणाल वाळिंबे

नातं

नात्याला हवं 

समजुतीचं कोंदण 

आपुलकीचं लिंपण 

नको शब्दांचा मारा 

असावा भावनांचा  ओलावा 

हवा प्रेमाचा पाझर 

नको तक्रारीचा सूर 

असावा आरसपानी विश्वास 

नसावी अवास्तव अपेक्षा 

असावा खेळकरपणा 

नसावी चढाओढीची भिंत 

असावी प्रेमाची किनार 

नसावं कुठलं बंधनं 

असावी हळुवारतेची फुंकर 

नसावं तडजोडीचं लेबल 

नातं असावं 

स्वच्छ नितळ पाण्यासमान 

कुणातही मिसळून 

एकजन्य होईल असं 

असावं घट्ट दृढ अभेद्य 

सहज न तुटणारं जसं 

म्हणूनच म्हणते 

जाणा नात्यांची महती 

हातातून वेळ  

निसण्याआधी 

मृणाल वाळिंबे  

शब्द

शब्दांनीच शिकवलयं 

हसायला 

शब्दांनीच शिकवलयं 

लिहायला 

शब्दांनीच घडवलयं 

मला 

शब्दांनीच दिलायं 

आधार मला 

शब्दच तर करतात 

माझी साथ संगत 

शब्दच सखा 

शब्दच माझा कर्ता करविता 

शब्दांची गुंफण 

हिच तर माझी खरी ओळख 

हरवून जाते मी 

या शब्दांच्या दुनियेत 

अन् लेखणी उतरवत जाते 

माझ्या मनातील तगमग 

हे शब्दच घालतात 

कधी तरी घाव 

अन् होऊन जातो 

रंगाचा बेरंग 

म्हणूनच म्हणते 

करा उधळण शब्दांची 

मोत्यासमान 

पण असू द्या भान 

आशयाचं 

मृणाल वाळिंबे  

मैत्रिणी

मैत्रिणी 

मैत्रिणी माझ्या जिवाभावाच्या 

जीवाला जीव देणाऱ्या 

मनाच्या तळातून प्रेम करणाऱ्या 

मैत्रिणी माझ्या जिव्हाळ्याच्या 

कुणाच्याही दु:खाने 

कावऱ्याबावऱ्या होणाऱ्या 

मैत्रिणी माझ्या मायेच्या 

सदैव आईच्या तोडीने 

पाठीवरून हात फिरवणाऱ्या 

मैत्रिणी माझ्या आपुलकीच्या 

हाकेला प्रतिसाद देणाऱ्या 

मैत्रिणी माझ्या मनकवड्या 

मनातील भाव 

ओठावर येण्याआधीच जाणणाऱ्या 

मैत्रिणी माझ्या प्रेमाच्या 

अत:पासून अंतापर्यंत 

प्रेम करणाऱ्या 

मैत्रिणी माझ्या आयुष्यभराच्या 

सदैव माझी साथ देणाऱ्या 

 माझ्या जीवनाचा 

अविभाज्य घटक असणाऱ्या 

आणखी काय म्हणू 

मैत्रिणी माझ्या एकाच 

नाळेने बांधलेल्या 

जणू काही माझीच छबी 

असलेल्या 

मृणाल वाळिंबे 

Marathi greetings for Sankranti

का कळेना  

कोणत्या क्षणी 

मन हे भांबवते 

कधी मोहरते  

कधी हुरहुरते 

हे नाते जन्मांतरीचे 

का कळेना  

कोणत्या क्षणी 

मन हे बावरते 

कधी हरवते 

हे नाते आपुलकीचे 

का कळेना  

कोणत्या क्षणी 

हे बंध जुळले प्रितीचे 

हळव्या ओल्या भावनांचे 

हे नाते रक्तापलीकडचे 

का कळेना  

कोणत्या क्षणी 

मनाच्या कप्प्यात स्थान मिळाले 

हे नाते पूर्वजन्मीचे 

मनास भिडलेले हे नाते 

असेच रहावे घट्ट कधीही 

विलग न होण्यासाठी 

मृणाल वाळिंबे 

अशा साऱ्या माझ्या सहदयांना 

संक्रांतिच्या खूप शुभेच्छा 

तिळगूळ घ्या अन् गोड गोड बोला 

मैत्री कट्टा निवांत क्षण

मारव्याचे एकाकी स्वर 

मावळतीला झालेला सूर्याचा अस्त 

बावरलेल्या संध्याकाळी 

जाणवणारा बोचरा गारवा 

मिट्ट काळोख्या रात्री 

बहरत जाणारा थंडावा 

रक्त गोठवणारी थंडी 

हातपायावर येणारा शहारा 

अशातच अचानक आलेला 

वाफाळलेल्या कॅाफीचा वास 

अन् क्षणार्धात तरळल्या 

साऱ्या जुन्या आठवणी मन:पटलावर 

 गुलाबी थंडीत  

उऱ्तरोऱ्तर बहणाऱ्या 

रात्रीसंगे 

छाटलेल्या त्या गप्पा 

 मैत्रिणींसोबत घेतलेले 

ते कॅाफीचे घुटके 

छान शांत असे 

स्व:तसाठी काढलेले 

ते निवांत क्षण 

हीच तर आहे 

खरी जीवनाची पुंजी 

मृणाल वाळिंबे